Siglir tar il cuntegn

Header

Ina dunna davant ina scolina destruida.
Legenda: Ina dunna davant ina scolina destruida. Reuters
cuntegn

Exteriur Situaziun umanitara dramatica en l'Ucraina da l'Ost

La situaziun umanitara en l'Ucraina da l'Ost saja dramatica. Quai scriva Nils Muiznieks, il cumissari per dretgs umans dal cussegl d'Europa a Strassburg.

Almain 5 milliuns persunas dovrian urgentamain agid. Bleras clinicas, scolas e scolinas sajan donnegiadas fermamain. En ospitals mancan cunzunt medicaments per tractar malsognas cardiovascularas ed auters mals.

Radund 8’000 persunas sajan mortas dapi l'avrigl da l'onn passà, almain 17’800 èn vegnidas blessadas.

Nagin'aua schubra per 1,3 milliuns umans

Tenor stimaziuns d'UNICEF n'han 1,3 milliuns persunas nagin'aua schubra da baiver. Pumpas d'aua na funcziunan betg, perquai che las raits electricas èn vegnidas donnegiadas tras ils cumbats. Per part èn las vias donnegiadas talmain, che l'access tar l'aua n'è betg pussaivel.

Tschertgar ina soluziun politica

Il cumissari per dretgs umans Muiznieks ha appellà a las autoritads ucranaisas da cooperar cun las organisaziuns d'agid. Latiers ha el supplitgà las partidas da conflict da tschertgar ina soluziun politica.

Dapi il settember vala in armistizi tranter ils separatists pro-russ e truppas ucranaisas.

RR novitads 17:00

Dapli da Exteriuravrir la Landingpage

Nach links scrollen Nach rechts scrollen