En las medias socialas sco Facebook u twitter vegnan las dunnas spezialmain savens offendidas massivamain u smanatschadas. Quai mussa ina retschertga dad Amnesty International. Tenor questa ha stgars in quart da las dunnas inditgà, ch'ellas sajan stadas en las medias socialas almain ina giada l'unfrenda d'attatgas. Quai resulta d'in studi dad Amnesty International, ch'è vegnì publitgà il glindesdì. Per il studi èn vegnidas dumandadas mintgamai 500 dunnas tranter 18 e 55 onns en 8 pajais.
Stress, tema u attatgas da panica sco consequenza
Sco consequenza da talas attatgas hajan passa la mesadad da las dunnas pertutgadas gì stress, tema u attatgas da panica. En stgars 60% dals cas hajan las dunnas patì da disturbis da durmir pervi da las persecuziuns en la rait. Pli che 40% da las dunnas sajan sa sentidas periclitadas corporalmain. Ed enfin in quart da las dunnas hajan er per propi obtegnì smanatschas da violenza fisica u sexuala.
Amnesty International pretenda uss da las raits socialas da prender serius il problem. Il privel grond da las attatgas en la rait saja, ch'ellas sa derasian fitg svelt. Mo stgars 20% da las dunnas dumandadas han inditgà che las mesiras dals purschiders da raits socialas per proteger da talas attatgas, sajan sufficientas.
RR novitads 07:00