Siglir tar il cuntegn

Header

Purtret d'in bus destruì ed ars ora cumplet.
Legenda: In dals vehichels destruids a Mogadischu en Soamlia. Reuters
cuntegn

Somalia Bunamain 100 morts tar attatga cun bumba a Mogadischu

Tar in attentat cun bumbas en la chapitala Mogadischu èn var 100 persunas mortas. Quai ha ditg in uffizial da la polizia envers l'agentura da novitads tudestga. Autras funtaunas discurran dad almain 75 unfrendas. Plinavant hai era dà blers blessads.

Tenor las forzas da segirezza è in attentader da suicidi sa siglientà en l'aria en in camiun durant il traffic da lavur da la damaun. Perditgas han discurrì da gronda devastaziun.

Video
Suenter l'attentat è da vesair fim a Mogadischu
Or da News-Clip dals 28.12.2019.
laschar ir

Sco quai ch'in pledader da la polizia ha declerà, sajan er dus busins cun uffants da scola vegnids donnegiads ferm. Tranter las unfrendas sajan er burgais tircs. Els sajan stads cun lur guardia en in auto cura ch'il camiun saja explodì. Tenor emprimas indicaziun sajan els stads inschigners che hajan gidà da renovar la colliaziun da via tranter Mogadischu ed il lieu Afgoye.

Malgrà ch'i na dat anc nagina brev da confess supponan las autoritads ch'igl è stà in'attatga da la milissa terroristica dad Al-Shabaab. La Al-Shabaab cumbatta dapi onns per la pussanza en il pajais. Ils fundamentalists sunnits han sut controlla grondas parts dal pajais en il sid ed il center da Somalia. Els attatgan adina puspè citads. Ils Stadis Unids sustegnan la regenza en il cumbat cunter la milissa, quai cun attatgas or da l'aria e cun scolar schuldads.

RTR novitads 09:00