En la Spagna datti puspè avis che laschan sperar che la pandemia daventia pli flaivla. Il segund di en fila han ins dumbrà dapli persunas ch'èn sa remessas da Covid-19 che persunas cun ina nov'infecziun. Quai ha communitgà il ministeri da sanadad spagnol.
Las davosas 24 uras han passa 3'500 pazients pudì ir a chasa, entant ch'il dumber da novs cas da corona è stà tar radund 3'000. En il medem temp sajan 378 persunas ch'han ina malsogna dal lom mortas. Avant intginas emnas era quai anc dubel uschè blers per di. En tut è il dumber da mortoris creschids sin bun 23'000, il dumber d'infectads sin 220'000 ed il dumber da quels ch'en sa remess sin 95'000.