I dettia anc differents problems che stoppian vegnir schliads, ha ditg il viceminister da l'exteriur iranais, Abbas Araghchi a Vienna.
Ordavant na possian ins betg discurrer dad ina cunvegnientscha. El ha però accentuà ch'els sajan da buna speranza ch'i dettia ina schliaziun.
Dapi la fin d'emna è la cunvegna istorica tranter las 5 pussanzas da veto da l'ONU, la Germania e l'Iran uschè concreta sco anc mai.
John Kerry optimistic
I saja anc da schliar intgins puncts difficils, però restia el optimistic. Quai ha ditg il minister da l'exteriur dals Stadis Unids, John Kerry.
Era la responsabla per ils affars da l’exteriur da l’Uniun europeica Federica Mogherini ha accentuà che las discussiuns sajan en la fasa decisiva. Uss dovri anc las decisiun politicas per schliar dus, trais puncts da discussiun, hai num or da circuls interns da las tractativas. Las tractativas finalas duran gia dapi passa duas emnas a Vienna ed èn adina puspè vegnidas prolungadas.
RR novitads 12:00
