Speranza suenter ils ferms terratrembels en Italia

Il di suenter ils dus ferms terratrembels sa mussa il minister da l'intern Angelino Alfano precautamain optimistic. «Sch’igl è uschia, ch’i n’ha betg dà victimas u grevamain blessads è quai, en vista a la fermezza dals terratrembels, ina miracla».

Uschia vegn Angelino Alfano cità da l’agentura da novitads svizra sda tenor in radio talian. Enfin uss rapportan las autoritads numnadamain dad in unic cas mortal. In um da 73 onns è mort dad in infarct da cor, probablamain causà entras in schoc dal terratrembel.

Il mument na vegnian naginas persunas tschertgadas sut ruinas, ha ditg il schef da la protecziun civila. Bleras persunas eran para gia sa rendidas sin via suenter l'emprima stremblida. Pliras scolas en la regiun duajan restar serradas.

Ils terratrembels la mesemna saira

Omadus terratrembels han gì lur epicenter datiers da la citad Perugia. Las stremblidas sajan stadas er da sentir en la chapitala Roma. Ina survista davart donns ed unfrendas eventualas manca il mument. L'emprima stremblida è capitada a las 19:11, la segunda a las 21:00.

Panica ed interrupziuns dal current

Surtut èn la provinza da Macerata en la regiun da la Marche èsi vegnì rapportà che chasas sajan crudadas ensemen suenter l'emprim terratrembel. Quai hai er dà interrupziuns dal current electric e da las lingias da telefon. Ils pumpiers han survegnì numerus telefons da burgais tementads. Bleras persunas èn curridas en panica sin via.

«Ina situaziun apocaliptica»

En la vischnanca da Ussita, datiers da l'epicenter dal ferm terratrembel posteriur, regia tenor il burgamester in'atmosfera sco la fin dal mund. «Igl è ina situaziun apocaliptica», ha ditg Marco Rinaldi envers l'emettur da televisiun Sky TG24.

Pervia da l'emprim terratrembel sajan dentant tut las persunas gia stada sin via tar il segund. El saja perquai da buna speranza che nagin na saja vegnì blessà. I saja stà il pli ferm terratrembel ch'el haja insacura fatg tras, uschia il burgamester. Quel saja stà «sgarschaivel lung».

Era Amatrice è pertutgà

Ad Amatrice, la citad ch'era vegnida destruida dal tuttafatg dal terratrembel ils 24 d'avust, èn dadas ensemen chasas ch'eran vegnidas donnegiadas. Lura aveva la terra stremblì cun ina fermezza da 6,0.

Prest 300 umans eran morts. Pliras citads eran vegnidas destruidas dal tuttafatg. Lezza giada era l’epicenter stà tar la vischnanca dad Amatrice en la regiun Lazio.

RR novitads 20:00