Siglir tar il cuntegn

Header

cuntegn

Exteriur Spustà ils discurs da pasch per la Siria

Sche pussaivel vul l'ONU clamar a maisa las partidas da conflict da la Siria ils 29 da schaner. Quai ha Staffan da Mistura, l'intermediatur spezial da l'ONU per la Siria communitgà.

Atgnamain avessan ils discurs da pasch gì da cumenzar oz a Genevra. Il Cussegl da segirezza da l'ONU era sa cunvegnì gia il december passà sin questa data. Enfin uss n'eri dentant betg cler tge represchentant da l'opposiziun che duai vegnir a Genevra.

La Russia che vala sco allià dal reschim da Baschar al-Assad n'era betg vegnida perina cun l'opposiziun en Siria tge represchentants da l'opposiziun che duain esser preschents a quests discurs. Anc ussa n'èsi betg cler tgi che vegn envidà als discurs.

La basa dals discurs è in plan da pasch ch'era vegnì acceptà cun ina resoluziun il december passà suenter avair contractà sur plirs mais. Tenor quest plan duai dar en Siria ina regenza transitorica e pir suenter duai vegnir decidì tge che succeda cun il president actual Baschar al-Assad.

La guerra civila en Siria ha cumenzà il 2011. Dapi lura èn passa 250'000 persunas mortas. Tenor indicaziuns da l'ONU èn 4,6 milliuns Sirians fugids en l'exteriur ed ulteriurs 6,6 milliuns Sirians èn fugids entaifer l'agen pajais.

RR novitads 16:00

Artitgels legids il pli savens