Siglir tar il cuntegn

Header

cuntegn

Squitsch da l'exteriur Ils talibans lubeschan a dunnas da visitar scolas cuntinuantas

L'emna proxima cumenza il nov onn da scola en l'Afganistan. Cun l'entschatta da quel, han ils talibans decidì da lubir a dunnas e mattas da pudair visitar scolas cuntinuantas. Tuttas scolas vegnian avertas per tuttas buobas e tut ils buobs, ha ditg in pledader dal ministeri da furmaziun a Kabul. Dentant possian mattas ir a scola be separà dals buobs. Ed ellas pon be vegnir scoladas da dunnas.

L'access per mattas e dunnas a scolaziun e furmaziun è stada ina da las pretensiuns centralas da la communitad internaziunala als talibans. Quels han surpiglià l'avust da l'onn passà suenter blers onns da cumbat la pussanza. Ils pli blers pajais na renconuschan dentant betg la nova pussanza en l'Afganistan, ed argumenteschan quai tranter auter cun la posiziun da las dunnas en ina societad fundamentalistic-islamistica. En lur emprima perioda da regenza dal 1996 fin il 2001 avevan ils talibans serrà or quasi cumplainamain dunnas da scolaziun ed er da tuttas professiuns.

Ils talibans vulan puspè reger il pajais tenor lur interpretaziun dal dretg islamic. Il medem mument èn els dentant avisads sin agid da milliardas dal vest, per franar la povradad e fomaz. L'onn passà èn questas finanzas dentant quasi vegnidas franadas dal tut.

Ils ultims mais han dunnas en l'Afganistan rapportà ch'i vegnia per gronda part scumandà ad ellas da far part a la vita publica. En blers cas hajan pertutgadas stuì dar si lur plazzas da lavur. Heather Barr ch'è responsabla per ils dretgs da dunnas tar Human Rights Watch, ha dentant avertì. Che dunnas possian uss ir a scola, na saja betg exnum in mussament ch'ils dretgs umans da dunnas vegnian resguardads.

Il Minisguard dals 11.09.2021 ha mussà divers aspects da l'Afganistan:

video
L'Afganistan ils 20 onns dapi las attatgas dal 2001
Or da Minisguard dals 11.09.2021.
laschar ir. Durada: 9 minutas 35 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga