Siglir tar il cuntegn

Header

cuntegn

Exteriur Squitsch sin Trump crescha

En l'affera davart ils contacts cun la Russia vegn il president dals Stadis Unids vinavant sut squitsch. El haja numnadamain empruvà dad impedir la giustia. Quai rapportan differentas medias americanas.

Donald Trump haja supplitgà il schef dal FBI, James Comey, da sistir las investigaziuns davart colliaziuns cun la Russia da l'anteriur cussegliader da segirezza naziunal, Michael Flynn. Quai resortia d’in protocol che Comey haja fatg suenter ina audienza tar Trump. Uschia rapportan la gasetta «New York Times» ed autras medias americanas. Ils 9 da matg aveva Trump relaschà il schef dal FBI surprendentamain.

L'uffizi presidial ha immediat renvià quests rapports. Quels na correspundian betg a la vardad. Il president n'haja betg supplitgà Comey da sistir questas u autras investigaziuns. La gievgia vul Trump respunder dumondas da schurnalists ad ina conferenza da pressa.

Congress vul scleriment

Tant democrats sco er republicans pretendan invista en il protocol da James Comey. I sa tractia dad in ferm mussament ch'il president haja empruvà dad impedir la giustia. Quai ha ditg il senatur dals democrats Richard Blumenthal. El pretenda ch'i dettia immediat in'investigaziun independenta tras in investigatur spezial.

Quai ha manà a la demissiun da president Nixon.
Autur: Erwin Chereminsky Expert dal dretg constituziunal

Parallelas cun Nixon?

Experts da la lescha decleran ch'ins possia interpretar la remartga dal president sin pliras modas. Decisiv saja però sulettamain l'intenziun da questa remartga. Sche Trump haja insistì che la polizia federala sisteschia sias investigaziuns, saja quai in impediment da la giustia. Quai ha ditg l'expert dal dretg constituziunal Erwin Chereminsky da l'University of California.

Er l'anteriur president Richard Nixon aveva relaschà en l'affera da Watergate in investigatur independent il 1973. Silsuenter era vegnida introducida ina procedura da relaschar il president dals Stadis Unids. In onn pli tard aveva Nixon demissiunà.

RR novitads 06:00

Artitgels legids il pli savens