La notg passada è la cifra da victimas da las attatgas da Pasca creschida per bainquant: En ils ospitals sajan mortas 38 persunas blessadas. Uschia han las attatgas da suicidi custà la vita ad almain 359 victimas, rapporta l’agentura da novitads svizra SDA tenor la polizia. Ulteriuras passa 400 persunas sajan anc en ils ospitals – tranter dad ellas er persunas en stadi critic.
Paucas infurmaziuns confermadas dals delinquents
Medemamain la notg passada sajan vegnidas prendidas en fermanza ulteriuras persunas suspectadas, scriva la SDA. Il mument sajan totalmain 60 persunas en arrest. Davart ils delinquents da las attatgas datti paucas infurmaziuns confermadas.
Il Stadi Islamic IS ha bain pretendì dad avair fatg las attatgas – tenor la regenza da Sri Lanka sajan dentant gruppas islamisticas indigenas responsablas.
Vendetga per Christchurch n'er betg confermada
La regenza da la Sri Lanka è da l’avis che las attatgas en ses pajais sajan la vendetga per l’attatga sin las moscheas a Christchurch ils 15 da mars en la Nova Zelanda. Or da la Nova Zelanda fa a savair la primministra Jacinda Ardern ch’ella n’haja naginas infurmaziuns da servetschs secrets che confermian quest avis.
La dumengia da Pasca eran vegnidas attatgadas trais baselgias cristianas en pliras citads e quatter hotels da luxus en la citad principala Colombo tras set attatgaders da suicidi. Intginas uras pli tard avevi dà duas ulteriuras explosiuns en ils conturns da Colombo.
RR novitads 06:00++
