La regenza taliana ha uss il sustegn dal parlament per prolungar il stadi d'urgenza pervi da corona fin mez october. Suenter il senat ha era la chombra dals deputads approvà la prolungaziun. Senza quella fiss il stadi d'urgenza scadì il venderdi.
Dapi il favrer ha l'Italia registrà passa 35'000 unfrendas da corona. Tenor experts è l'unda d'infecziun cun il virus il mument sut controlla. Ier haja il pajais cun 60 milliuns abitants be nudà radund 200 novs cas.
Il stadi d'urgenza en Italia vegn normalmain en funcziun suenter catastrofas natiralas sco terratrembels u inundaziuns. Lura pol il stadi reparter pli svelt l'agid necessari, senza l'entira birocrazia. En Italia vala il stadi d'urgenza dapi ils 31 da schaner.
Situaziun internaziunala
L'Italia aveva il coronavirus tutgà fitg ferm a l'entschatta da la pandemia. Cun mesiras fitg severas è l'Italia uss vegnida da sut controlla cun la situaziun. Auter guarda quai ora en la Brasilia ed ils Stadis Unids.
La Brasilia ha registrà in record da novas infecziuns cun il coronavirus entaifer in di: Sco quai ch'il ministeri da sanadad ha communitgà, sajan passa 69'000 persunas s'infectadas da nov entaifer 24 uras. Totalmain dumbra il pajais sidmerican passa 2,5 milliuns infecziuns dapi l'entschatta da la pandemia. Tenor indicaziuns uffizialas èn passa 90'000 persunas mortas en consequenza da Covic-19.
Sulettamain ils Stadis Unids nodan anc dapli infecziuns e mortoris che la Brasilia. Lezs dumbran fin uss passa 4,4 milliuns infecziuns e passa 150'000 mortoris.