- En ils Stadis Unids han aderents dal president betg reelegì Donald Trump assaglì il capitol. Quatter persunas èn mortas, 52 persunas èn blessadas. Il bajetg è vegnì rumì, il congress ha puspè cuntinuà.
- Trump aveva appellà a ses aderents da sa radunar avant il capitol e demonstrar cunter l'elecziun engulada – sco el numna la victoria da ses concurrent Joe Biden. Millis persunas han dà suatientscha a ses appel. Pliras persunas han stuì vegnir messas en segirtad, uschia la nova vicepresidenta Kamala Harris e la presidenta da la chasa dals represchentants, la Democrata Nancy Pelosi.
- En il stadi federativ Georgia han ils dus candidats democrats gudagnà ils ultims dus sezs dal senat. Uschia han Democrats e Republicans mintgamai la mesadad da las vuschs en il senat. La decisiun da tagl dat en l'avegnir la nova vicepresidenta Kamala Harris.
- Pervi dals protests ha la presidenta da la citad da Washington, Muriel Bowser, proclamà in scumond da sortida fin damaun marvegl da las 6 temp local.
- Il president elegì, Joe Biden ha sentenzià ils eveniments a Washington. La democrazia vegnia attatgada. La violenza stoppia chalar. E vers Trump ha Biden ditg, ch'el duaja sa preschentar a la televisiun e pretender ina finiziun da la bloccada e defender la constituziun.
- Quai ha quel la fin finala era fatg sur Twitter. El ha appellà a ses aderents dad ir a chasa, ma betg senza accentuar che l'elecziun saja vegnida engulada.
- Trump ha publitgà en in video en las medias socialas. En quel accentuescha el er che l’elecziun saja vegnida engulada. perquai han Twitter e Facebook bloccà il conto da Trump per 24 uras. El haja cuntrafatg pliras giadas cunter las directivas da la plattafurma – argumentescha twitter.
- Il vice-president Mike Pence ha sentenzià l'agir turbulent a Washington. Protests paschaivels sajan il dretg da mintg'American, ma quest assagl sin il capitol na vegnia betg tolerà e quels e quellas che sajan pertutgads vegnian fatg responsabels cun tutta vehemenza legala. Pence funghescha era sco president dal senat.
- Declerar las elecziuns americanas sco nunvalaivlas pudess donnegiar la republica per adina. Quai ha il manader da la maioritad en il senat american, il Republican Mitch McConnel ditg. El è uschia sa mess cleramain cunter emprovas da si'atgna partida, da vulair far cupitgar ils resultats. Il pievel, ils stadis federativs e las dretgiras hajan pledà. En vista a las votaziuns en il senat davart protestas cunter ils resultats da las elecziuns ha McConnel ditg che quai saja il pli impurtant votum en ses 36 onns en il senat.
audio
Per tadlar curt e cumpact
ord Novitads dals 07.01.2021.
Maletg: RTR
laschar ir. Durada: 1 minuta 32 Secundas.