Siglir tar il cuntegn

Exteriur Stadis Unids: Dissonanzas tar ils democrats

Be mo ils dis da partida dals republicans han cumenzà cun in eclat, ma er quels dals democrats. Quai pervi da l'affera dad e-mails ch'è vegnida enconuschenta.

Di da partida dals democrats.
Legenda: L'entschatta dals dis da partida dals democrats n'è betg propi gartegiada. Keystone

Il directori da la partida è sa perstgisà en in document uffizialmain tar in concurrent da Hillary Clinton, Bernie Sanders pervi da l'affera dad e-mails. La raschun èn e-mails ch'èn vegnids a la glisch che laschan supponer ch'il directori ha preferì da la bell'entschatta Hillary Clinton envers Sanders en las preelecziuns per il presidi american.

Beneventà cun l'applaus da millis da delegads ha Sanders appellà d'eleger Hillary Clinton. Il politicher da 74 onns ha drizzà il focus sin l'inimi cuminaivel Donald Trump. Il republican saja il candidat il pli terribel ch'ils Stadis Unids hajan gì en lur istorgia moderna.

Era sche Bernie Sanders ha appellà al congress da sustegnair Hillary Clinton è ina part dals passa 4'700 delegads anc adina vilada. Quai malgrà che la secretaria generala da la partida democratica Debbie Wasserman Schultz, il link avra en ina nova fanestra è sa retratga en consequenza da l'affera.

FBI investighescha

La polizia federala FBI ha annunzià d’intercurir il cas. Parts da la partida democratica fan responsabels hackers russ per l’attatga da cyber. Il venderdi passà aveva la plattafurma da scuverta Wikileaks publitgà passa 20’000 e-mails da commembers da la suprastanza dals democrats.

RR novitads 06:00