Suenter che las autoritads americanas han pudì impedir in cumplot en il stadi federativ da Michigan, èn novs detagls vegnids a la glisch. Extremists supponids èn vegnids arrestads pervi dal rapinament empruvà da la guvernatura Gretchen Whitmer. Quels duain er avair gì en mira il guvernatur dal stadi federativ Virginia, Raph Northam. Quai han rapportà mardi diversas medias en ils Stadis Unids suenter in'audiziun davant la dretgira. Northam ed auters collavuraturs da regenza sajan vegnids en mira, perquai ch'els han relaschà mesiras per evitar ch'il coronavirus sa derasia pli ferm.
Northam ha declerà ch'i na dettia nagin privel direct per el u sia famiglia. Durant las retschertgas haja l'FBI sulet alarmà ils commembers dal team da segirezza dal guvernatur, ha declerà la pledadra da Northam.
Whitmer e Northam appartegnan omadus a la partida democratica. Els avevan relaschà la primavaira mesiras severas pervi dal coronavirus. Il president Donald Trump aveva lura anc animà protestas da ses aderents encunter las mesiras. Sin Twitter ha el scrit: «Deliberai Michigan!», «Deliberai Minnesota!» e «Deliberai Virginia».
L'emna passada èn 13 persunas vegnidas arrestadas perquai ch'ellas duain avair planisà il rapinament da la guvernatura. A sis umens smanatschan sentenzias sin palc federal. Parallel tar quests cas examinescha il ministeri da giustia da Michigan las accusas per set ulteriurs umens.
Ord l'archiv da SRF:
La «Tagesschau» ha rapportà dal cas da la guvernatura da Michigan.
