Il minister da l'exteriur american, John Kerry, ha appellà al reschim sirian ed a ses gidanters da chalar da bumbardar l'opposiziun, cunzunt ad Aleppo. Ils discurs da pasch a Genevra sajan era vegnids spustads perquai ch'i saja grev da chattar ina soluziun politica entant ch'ins impedeschia agid umanitar e mazzia glieud innocenta.
Ils discurs, tar ils quals las Naziuns Unidas, ONU intermedieschan vegnan “interruts transitoricamain” aveva ditg de Mistura la saira avant. El na saja ni dischillus ni frustrà davart il svilup dals discurs. Ins stoppia però esser realistic.
Quels dis aveva de Mistura entupà separadamain la delegaziun dal reschim sirian e quella da l'opposiziun. Ils discurs n'hajan betg fatg naufragi, ha Mistura punctuà en la televisiun.
Ils cumbats en Siria e lur influenza sin ils discurs
Durant che l’ONU fa a Genevra tut il pussaivel per intermediar la via tar ina pasch en Siria, para il reschim sirian dad avair gì in success impurtant en ils cumbats enturn la citad siriana Aleppo. L’armada dal reschim haja interrut la ruta da provediment dals rebels.
Aleppo è l’ultim grond center da citad ch’è anc sut la controlla dals rebels. In success dal reschim augmenta anc pli fitg il squitsch sin ils negoziaders da l’opposiziun.
RR novitads 6:00