Almain otg persunas èn mortas tenor indicaziuns da medias americanas, tar in festival da musica a Houston en il stadi federativ da Texas. Pliras ulteriuras persunas sajan vegnidas blessadas al Astroworld Festival, ha rapportà l'emettur da televisiun CNN, sa referind sin ils pumpiers.
Las circumstanzas exactas n'èn anc betg enconuschentas. Sco las medias rapportan, saja la disgrazia capitada durant il concert dal rapper Travis Scott. La fulla haja smatga pli e pli fitg enavant envers la tribuna e quai haja provocà la panica. Sinaquai ha il rapper lura interrut il concert. Tenor medias americanas hajan radund 50'000 persunas visità il festival.
Ina communicaziun uffiziala dals organisaturs n'hai fin uss anc betg dà. Al festival avessan artists sco SZA e Bad Bunny gì da passar si. Ils concerts da sonda èn dentant vegnids desditgs.