Tenor ses manager Jarez Posey e sia managera Susan Heber è Coolio vegnì chattà mort en la chasa d'in enconuschent. Indicaziuns davart la raschun da la mort na datti fin uss betg.
As I walk through the valley of the shadow of death, I take a look at my life and realize there’s not much left, ‘cause I’ve been blastin’ and laughin’ so long, that even my mama thinks that my mind is gone.
Plirs rappers e musicists han reagì en las raits socialas sin la mort da Coolio. Tranter auter Ice Cube ubain Questlove. U era l’actura Michelle Pfeiffer che ha anc ina giada engrazià per il soundtrack dal film «Dangerous Minds.
Coolio ha per propi num Artis Leon Ivey Junior ed è naschì a Monessen en il stadi federal american Pennsylvania. 1994 ha el publitgà ses album da debut «It Takes a Thief» che ha gì grond success ensemen cun la single «Fantastic Voyage». Be in onn pli tard è ses segund album «Gangsta’s Paradise» cumparì. La single cun il medem titel è stà il soundtrack tar il film «Dangerous Minds» cun Michelle Pfeiffer. Cun quella chanzun ha Coolio conquistà la parada da hits, ha survegnì in Grammy e gudagnà in plaz en l’istorgia dal Hip Hop.
Silsuenter n’han ins betg pli udì bler dal rapper american. Insaquantas singles, pliras cumparsas en differentas emissiuns da televisiun – tranter auter era il 2004 en l’emissiun tudestga «Comeback – Die grosse Chance» sin ProSieben.
