Tgi che dumondia en elecziuns per responsabladad politica, na dastgia betg guntgir cura ch’el haja quella en mauns, ha Steinmeier ditg il glindesdi suenter in inscunter cun la chanceliera Angela Merkel. Questa responsabladad na possia betg simplamain vegnir returnada als votants.
Ils proxims dis vul Steinmeier far discurs cun tut ils schefs da las partidas ch’èn stadas involvidas las davosas emnas en ils discurs per ina coaliziun. Quai èn la CSU, la FDP ed ils Verds. E plinavant ha el er ditg tras las lingias, ch’el veglia discurrer cun ils Socialdemocrats.
Ils Socialdemocrats vulan novas elecziuns
Suenter ch’ils discurs da Giamaica per chattar in consens da furmar ina coaliziun han fatg naufragi, excluda la SPD da far da sia vart ina coaliziun cun la CDU/CSU.
La suprastanza da la SPD ha decidì unanimamain da betg vulair ina coaliziun gronda sco fin qua, cun la CDU e la CSU. Quai ha l’agentura da novitads dpa udì or da circuls da la partida. A lur giavisch per elecziuns novas ha il president Steinmeier entant dà in chanaster.
Inscunter Steinmeier e Merkel
Il glindesdi da mezdi eran il president da la Republica federala, Frank-Walter Steinmeier, e la chanceliera Angela Merkel s'inscuntrads. Els han discutà davart il naufragi dals discurs da coaliziun da Jamaica e co i duai ir vinavant.
Ils Liberals tiran il frain
Tard la dumengia saira era vegnì ora, ch'ils discurs da sondagi per ina regenza da coaliziun tranter CDU, CSU, FDP ed ils Verds hajan fatg naufragi. La FDP era sa retratga dals discurs. Ils Liberals han communitgà, ch'els na vegnian pli a far part da tractativas per ina coaliziun Jamaica. I saja meglier da na betg reger che da reger fallà.
Pli che quatter emnas avevan las partidas CDU, CSU, FDP ed ils Verds dal la Germania cumbattì per cumpromiss.
Merkel deplorescha
La chanceliera tudestga Angela Merkel ha deplorà la retratga da la FDP ord las tractativas per Jamaica. E sumegliant han era reagì la CSU ed ils Verds. Cun la decisiun dals Liberals pudess Merkel glischnar en la pli gronda crisa, dapi ch'ella è en uffizi.
Otg emnas suenter las elecziuns tudestgas n'èsi uschia betg cler, co ch'i va vinavant. Il president da la Germania, Frank-Walther Steinmeier, ha pir la fin d'emna admonì las partidas da surprender responsabladad ed evitar novas elecziuns.
RR novitads 06:00++