Siglir tar il cuntegn

Exteriur Stemprads en Grezia procuran per gronds donns

Dapi dis datti gronds stemprads en la Grezia. Quels han procurà per gronds donns surtut en il vest da la chapitala Athen. Era vinavant èsi da quintar cun inundaziuns, avertescha il servetsch civil.

Persunas inspecteschan ina via destruida, speras in aual da malauras
Legenda: Persunas inspecteschan ina via destruida a Nea Peramos el vest d'Attica. Keystone

Sco il radio statala ha infurmà èn grondas parts da la via da la costa che maina en il vest d'Athen vers Corinth destruida. Sco las autoritads scrivan sajan almain 16 persunas mortas, 4 valan anc sco sparidas, 17 persunas èn per part grevamain blessadas.

Il schef da regenza Alexis Tsipras ha ordinà trais dis malencurada uffiziala. A las persunas pertutgadas ha el sincerà agid finanzial.

Hurican mediterran chaschuna donns fin a duas milliardas euros

Meteorologs discurran d'in hurican mediterran – ina sort stemprà da pressiun bassa sco quai ch'ins enconuschia da las tropas. Il donn finanzial possia cuntanscher la marca da duas milliardas euros, schazegian las autoritads localas. Anc uss saja dentant anc memia baud da vesair la dimensiun exacta da la catastrofa, ha ditg in pledader dal ministeri da l'intern viers la televisiun greca.

Auals emplenids

La procura publica greca a ordinà ina examinaziun: En las regiuns pertutgadas enturn las citads Elefsina e Megara avevan ins ils ultims decennis emplenì cun terra bunamain tut ils auals per bajegiar chasas. L'aua da las muntognas vischinantas na pudeva perquai betg pli cular fin la mar. Perquai saja l'aua filada sco ina unda tras ils vitgs, han abitants ed il cuvitg da la regiun ditg.

RR novitads 21:00