Siglir tar il cuntegn

Exteriur Stgalim d'alarm il pli aut per vulcan a Bali

Sin l'insla da vacanzas Bali smanatscha il vulcan Gunung Agung d'erumper. La regenza ha ordinà glindesdi a radund 100'000 indigens e turists da bandunar la regiun dal vulcan.

Persunas che ston fugir
Legenda: Gia il december eran pli che 130'000 persunas vegnidas evacuadas. Keystone

Dapi sonda spida il vulcan Gunung Anung ora in nivel da fim e tschendra. Quel è il glindesdi ascendì enfin 3400 meters sur la terra. Perquai han las autoritads proclamà il pli aut stgalim d'alarm. La zona scumandada è vegnida engrondida da set a 10 kilometers en la vischinanza dal vulcan.

Plinavant datti era uschenumnads «Lahars»: Sediments da plirs meters sa maschaidan cun aua da plievgia e flueschan aval. Blessads n'hai dentant betg dà.

Blers ston fugir, esters na son dentant betg fugir dal tut

La tschendra cuvra era parts da vischnancas vischinas. Bleras mascras da protecziun èn vegnidas repartidas ed ils alloschis provisorics èn s'emplanids. L'autoritad da protecziun da catastrofas ha communitgà che 40'000 persunas sajan gia scappadas. I sajan dentant anc pli che 60'000 che stoppian ir en segirtad.

Era il traffic aviatic internaziunal è bloccà. Il glindesdi è il eroport da la citad principala Denpasar vegnì serrà. Dapli che 59'000 persunas èn stadas pertutgadas d'annullaziuns da sgols.

Datti questa giada propi in'erupziun?

Gia il settember aveva la regenza indonaisa proclamà il stgalim d'alarm il pli aut. Pli che 130'000 persunas eran vegnidas evacuadas senza ch'i è la fin finala capità insatge. Il pledader da l'autoritad per catastrofas Sutopo Nugroho fa dentant attent che las explosiuns occasiunalas ensemen cun flommas sajan in segn ch'i dettia immediatamain ina explosiun pli gronda.

La davosa erupziun è stada il davos tschientaner, numnadamain il 1963. Questa è stada immensa ed ha mazzà dapli che 1100 persunas.

RR novitads 15:00