Era cun fitg gronds sforzs vegnia ina gronda part dals glatschers sin l'entir mund a svanir. Questa prognosa fa in studi, publitgà en la revista dal fatg «Science». Bunamain la mesadad dals passa 200'000 glatschers resguardads vegnian a lur fin l'onn 2100, sche l'augment da la temperatura vegnia limità sin 1,5 grads.
Quasi nagins glatschers pli cun la politica actuala
Sch'i vegn ad esser 2 grads pli chaud il 2100, lura pon ins quintar cun la spariziun da 70% da glatschers pitschens. Ina stgaudada globala da 2 grads è la stgaudada maximala prevesida en la cunvegna da Paris.
En il mument vesi dentant ora suenter dapli: cun quai ch'è vegnì decidì 2021 a Glasgow, vegni ad esser 2,7 grads pli chaud l'onn 2100. Lura, uschia prognostitgescha il studi, datti en las Alps, a Canada, ils Stadis Unids ed en la Nova Zelanda quasi nagins glatschers pli.
Ina buna nova han ils auturs dal studi era. Mesiras immediatas ed effectivas possian salvar blers glatschers.
