Sfunsaders israelians han chattà in stgazi antic. A la costa da la Mar Mediterrana en il port da la citad antica Caesarea han els chattà plirs milli tocs munaid’antica e pliras statuas da bronz. Gia avant bun in onn era vegnì chattà a Caesarea in stgazi da radund 2’000 munaidas d’aur.
Pli gronda scuverta dapi 30 onns
I sa tracta dal cuntegn d’in bastiment sfunsà avant radund 1’600 onns ord dal temp roman, ha communitgà il servetsch archeologic israelian. Al bastiment na saja quai betg reussì da bandunar il port, ins suppona in stemprà. La posiziun da l'ancra sut mar saja in indizi per quai. Il chat dals 16 da matg saja la pli gronda scuverta dapi 30 onns.
Pliras statuas da bronz sajan mantegnidas fitg bain, per exempel figuras dal dieu dal sulegl Sol, la dieua da la glina Luna ed in sclav african. Plinavant cuntegna il stgazi er fragments da trais statuas da bronz da grondezza natirala.
Sfunsaders vegnan onurads
Ils sfunsaders da hobby avevan immediat annunzià il stgazi e duajan uss vegnir onurads. Al fund da la mar sa chattian er restanzas dal bastiment e l’ancra da lain e metal. Jacob Sharvit da la partiziun per archeologia sutmarina ha pledà da «chats extrem excitants». Quels na sajan betg mo fitg bels, mabain er da muntada istorica.
RR novitads 14:00