Il Premi Nobel da fisica onurescha quest onn perscrutaziuns davart foras nairas. Quai ha l’Academia roiala svedaisa per scienzas a Stockholm annunzià il mardi. Ina mesadad dal Premi Nobel survegn Roger Penrose da la Gronda Britannia. El haja pudì mussar che la teoria da la relativitad dad Albert Einstein mainia a foras nairas.
L’autra mesadad dal Premi Nobel survegnan il Tudestg Reinhard Genzel e l’Americana Andrea Ghez. Els han scuvert in object super massiv e cumpact en il center da nossa galaxia. La suletta explicaziun per quest fenomen enfin uss saja, ch'i sa tractia d'ina fora naira. L'astronoma da 55 onns Andrea Ghez è pir la quarta dunna che survegn il Premi Nobel da fisica.