Siglir tar il cuntegn

Header

Video
Impurtanta scuverta per tractar diversas malsognas
Or da News-Clip dals 07.10.2019.
abspielen
cuntegn

Stockholm – Premi Nobel Il premi per medischina va a dus Americans ed in Brit

Ils trais scienzads William G. Kaelin Jr (USA), Sir Peter J. Ratcliffe (GB) e Gregg L. Semenza (USA) vegnan onurads per lur scuverta da mecanissems moleculars. Cun agid da quels pon cellas enconuscher la concentraziun d'oxigen. Quai ha communitgà il glindesdi l'Institut Karolinska a Stockholm.

Oxigen è central per la vita sin terra e per l'organissem. Co exact che las cellas enconuschan differentas funtaunas dad oxigen e s'adatteschan a quellas è dentant ditg stà nuncler. Ils premiads hajan scuvrì cun lur scienza quest mecanissem molecular, scriva il comité Nobel.

Impurtant per guarir bleras malsognas

L'enconuschientscha da quest mecanissem saja impurtanta per tractar diversas malsognas. Ella saja fundamentala per cumbatter malsognas sco mancanza da sang u cancer, communitgescha la schuria.

Ils Premis Nobel

  • La pli auta distincziun per la scienza da medischina è dotada quest onn cun radund 905'000 francs ( 9 milliuns curunas svedaisas). Il premi da medischina è l'emprim ch'è vegnì communitgà.
  • Il mardi e la mesemna da quest'emna vegnan fatgs enconuschents ils premiads per fisica e chemia e
  • gievgia suonda il Premi Nobel per litteratura.
  • Il venderdi vegn lura communitgà ad Oslo, tgi che survegn quest onn il Premi Nobel per la pasch e
  • sco ultim vegn proxim glindesdi anc publitgà, tgi che gudogna il Premi Nobel d'economia che vegn surdà da la banca svedaisa Sveriges Riksbank.

L'onn passà avevan ils dus immunologs James Allison da l'USA e Tasuku Honjo dal Giapun survegnì il Premi Nobel per medischina. Els eran vegnids onurads per sviluppar terapias spezialas cunter cancer.

RR novitads 14:00