Siglir tar il cuntegn

Header

cuntegn

Exteriur Strusch speranza da chattar survivents

Il segund di suenter la sballunada da la punt a Genua datti be anc pitschnas speranzas da chattar survivents. Per la regiun da Genua ha la regenza taliana decretà il stadi d’urgenza per in onn. La regenza ha mess a disposiziun 5 milliuns euros sco agid urgent.

  • Probabel na datti nagins survivents pli sut las ruinas da la punt.
  • La regenza taliana fa per part responsabla l’Uniun europeica – cun las obligaziuns da spargnar manchian ils daners.
  • Ma er il «movimento 5 Stelle» ha impedì che las punts en la regiun da Genua vegnan sanadas.

Cun fin a 20 unfrendas che pudessan esser sut las ruinas, quinta il procuratur public responsabel. Ed entant han las autoritads curregì il dumber uffizial da las unfrendas – sin 38. Per quellas duai dar la sonda ina sepultura, ed era ina malencurada naziunala.

audio
Mezdi: L'impurtanza da las punts per la citad da Genua
ord Actualitad dals 16.08.2018.
laschar ir. Durada: 2 minutas 53 Secundas.

Reglas da deficits impedeschan investiziuns

Il minister dal intern talian Matteo Salvini ha fatg responsabla l’Uniun europeica e sias restricziun da spargnar per la mancanza da daners per far sanaziuns. L’UE ha refusà las reproschas. Ils stadis commembers hajan sezs da metter prioritads nua ch’els vulan investir e Brüssel haja gia fatg attent l’Italia d’investir en l’infrastructura. Per la perioda dal 2014 fin il 2020 survegn l’Italia da l’UE tut en tut 2,5 milliardas euros per vias e viafiers.

La rolla dal «movimento 5 Stelle»

Gia dapi blers onns vegn debattà sur da pussaivlas vias per sanar la rait d’autostrada en la regiun da Genua. Uschia vuleva l’interpresa «autostrade per l’Italia» sanar sezza l’infrastructura e da l’autra vart avess quella lura survegnì ina prolungaziun da la concessiun. Impedì il project ha la politica ed en emprima lingia il «movimento 5 Stelle». Uschia haja il schef Beppe Grillo scrit sin medias socialas che la punt da Morandi vegnia a tegnair segir ils proxims 50 onns. Uss han ils responsabels stizzà las communicaziuns sin las medias socialas.

RR novitads 06:00

Artitgels legids il pli savens