Siglir tar il cuntegn

Header

cuntegn

Studi da Oxfam Forsch tranter pauper e ritg s'avra adina pli fitg

La forsch tranter ils pli paupers ed ils pli ritgs dal mund s’avra adina pli fitg. Quai demussa l’ultim rapport da l’organisaziun d’agid Oxfam.

Dapi l’entschatta da la pandemia da Covid-19 hajan il 1% il pli ritg da la populaziun mundiala accumulà duas giadas uschè blera facultad nova sco tut ils auters 99% ensemen. La facultad dals milliardaris e da las milliardarias saja dapi il 2020 creschida per 2,7 milliardas dollars per di. Els sajan stads ils gronds profiturs da las davosas crisas – per exempel da la pandemia sco er da la crisa d’energia.

Oxfam

Avrir la box Serrar la box

Oxfam è ina cuminanza da differentas instituziuns d'agid e da svilup. Tenor atgnas indicaziuns vulan els cumbatter paupradad a moda persistenta e crear basas d'existentas segiras.

L'access a scolaziun, in sistem da sanadad segir, access ad aua da baiver ed indriz d'igiena sco er l'agid tar catastrofas tutgan er tar lur finamiras.

Il medem mument creschi per l’emprima giada dapi 25 onns puspè la paupradad extrema sin l’entir mund, scriva l’organisaziun d’agid vinavant. Radund mintga 10avel uman sin il mund stoppia patir fom.

Pretensiun: «taglia onestas»

En vista al WEF a Tavau, che cumenza oz, pretenda Oxfam sco er l'uniun Solidar Suisse «taglias onestas» per las persunas ritgas. Cun pli autas taglias per ritgas e ritgs possian ins far in pass en in mund pli gist e pli persistent, senza paupradad. Sur decennis haja la reducziun da la taglia per concerns e super-ritgs intensivà l’inegualitad.

Tenor calculaziuns dad Oxfam purtass ina taglia sin la facultad da 2% sin ils milliunaris, da 3% sun facultads pli autas che 50 milliuns ed ina taglia da facultad da 5% sun milliardaris in import annual da 1,7 billiuns dollars. Quai bastass per cumbatter la paupradad da 2 milliardas persunas, uschia Oxfam.

audio
Per tadlar: curt e cumpact
ord RTR Audio dals 16.01.2023.
laschar ir. Durada: 1 minuta 10 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga