Siglir tar il cuntegn

Header

cuntegn

Studi varianta Delta Ristg da vegnir en ospital cun Delta dubel uschè grond

Il ristg da vegnir uschè malsaun ch'ins sto ier en ospital è cun la «varianta Delta» dubel uschè grond sco cun la varianta dominanta d'enfin uss, la «varianta Alpha».

La «varianta Delta» dal coronavirus n’è betg mo pli contagiusa, ella maina er a dapli ospitalisaziuns che la varianta originala dal virus. Quai mussa in studi da la Gronda Britannia. Scienziads da l’universitad da Cambridge e da l’uffizi da sanadad britannic han analisà passa 43'000 cas. Tenor il studi saja il risico da vegnir ospitalisà entaifer duas emnas suenter in test positiv, dapli che duas giadas uschè grond sco tar la «varianta Alpha».

Il studi

Avrir la box Serrar la box

Scienziads da l'Universitad da Cambridge e da l'uffizi da sanadad publica da l'Engalterra han valità cas da corona en Engalterra tranter la fin mars e la fin matg dal 2021. Ils resultats publitgats en la gasetta scientifica «Lancet Infectious Dieseases» èn sur tut da muntada per persunas senza virola. Per persunas viroladas cumplainamain, na pon ins betg trair conclusiuns.

Enfin uss avevan studis sur tut confermà che la varianta Delta è pli contagiusa che la varianta oriunda. Davart quai che la varianta fiss er pli privlusa n'hai fin uss betg dà cumprvas. Uss han ils scienziads da Cambridge duvrà datas da dieschmillis tests positivs ch'eran mintgamai vegnids partids en tar la varianta Alpha u Delta. Cnap 9'000 da quels tests èn ids enavos sin la varianta Delta, radund 35'000 sin Alpha. Vitiers han ils scienziads observà quantas persunas ch'èn vegnidas ospitalisadas.

Ristg 2,26 giadas pli grond

Suenter ch'ils scienziads avevan reglà ils facturs sco vegliadetgna u demografia, han ils resultats mussà ch'il ristg da vegnir pervi da la varianta Delta en l'ospital è per 2,26 giadas pli aut che cun la varianta Alpha.

Tranter ils passa 40'000 cas intercurids en il studi, eran be 1,8% persunas viroladas cumplainamain. Quai han ils scienziads interpretà sco ulteriura conferma per la protecziun fitg auta dals vaccins. 74% dals infectads n'eran betg vaccinads, 24% eran vaccinads pir per part, pia be cun ina dosa. Perquai ch'i hajan dentant uschè paucas datas da persunas vaccinadas, na possian ins betg trair ina conclusiun, sch'il ristg per in decurs grev da la malsogna saja er avant maun tar persunas vaccinadas.

video
Urs Karrer: «Il risico d'ospitalisaziuns per persunas è creschì entras Delta»
Or da News-Clip dals 24.08.2021.
laschar ir

RTR novitads 06:00

Artitgels legids il pli savens

Scrollar a sanestra Scrollar a dretga