En Germania han las auotritads arrestà dus umens da la Svizra ch'avevan para planisà in'attatga cun material explosiv. Ils dus umens levan tenor indicaziuns da la poizia cumprar chargia explosiva a Stuttgart. Tar quai sajan els vegnids arrestads da forzas specialisadas, communitgeschan la procura publica e l'uffizi criminal da Baden-Württemberg.
Ins saja vegnì attent sin ils dus umens tar investigaziuns en il Darknet. Las autoritads partan dal fatg che quels levian duvrar la chargia explosiva per in delict planisà en ina citad gronda en Svizra. Fin ussa na dettia però nagins indizis per in motiv politic. Dapli detagls dals resultats da las investigaziuns n'èn betg vegnids publitgads. Ils dus Svizzers da 24 e 26 onns sa chattan en arrest d'inquisiziun.