Siglir tar il cuntegn
Inhalt

Exteriur Sudan dal Sid: rebels laschan liber 300 uffants schuldads

Ils uffants sajan vegnids surdads a las autoritads ed organisaziuns d’agid en il sidvest dal pajais, ha communitgà la missiun da las Naziuns Unidas en il Sudan.

Uffants schuldads.
Legenda: Blers uffants restan dentant anc en ils mauns dals rebels. (archiv) Keystone

Tenor la missiun da las Naziuns Unidas en il Sudan èn uss 311 uffants schuldads en libertad. Ils rebels han surdà ils radund 220 buobs e las bunamain 90 buobas a las autoritads ed organisaziuns d'agid. En il decurs da las proximas emnas duain en tut vegnir libers 700 uffants schuldads.

Totalmain vegnan en il Sudan dal Sid radund 19'000 uffants malduvrads sco schuldads. Questa cifra deriva da l'ovra d’agid per uffants da las Naziuns Unidas UNICEF.

RR novitads 16:00