L'anteriur president e primminister da la Tirchia, Süleyman Demirel è mort. Demirel ch'aveva 90 onns saja mort en in ospital ad Ankara en consequenza d'in'infecziun da la via respiratorica, scriva l'agentura da novitads Anadolu.
Demirel è stà pliras giadas primminister da la Tirchia ils onns 60 e 70. Dal 1993 enfin l'onn 2000 è el stà president da la Tirchia.
El ha cumenzà sia carriera politica suenter il putsch militar dal 1960. Il 1965 è el vegnì per l'emprima giada primminister. 11 onns è el stà en quest uffizi. Ils onns 1971 ed 1980 è el vegnì cupitgà da l'armada tirca.
