- L'anteriur primminister dal Giapun Shinzo Abe è mort vi da las blessuras da l'attentat, quai rapportan pliras medias en il Giapun, sco per exempel l'emettur da televisiun giapunais, NHK.
- Sin l'anteriur schef da regenza era vegnì sajettà durant in pled per in cumbat electoral, quai a mesa via.
- In um haja sajettà da cler di sin Abe, rapportan medias giapunaisas. L'attentader saja in anteriur commember da l'armada giapunaisa. Davart ses motiv na datti naginas indicaziuns uffizialas. L'um è vegnì arrestà da la polizia.
Venderdi avantmezdi ha in um sajettà sin l'anteriur primminister dal Giapun, ch'era vi da dar in pled en la citad Nara en connex cun las elecziuns che avessan gì lieu dumengia en il pajais. Tenor rapports da medias saja vegnì sajettà duas giadas da davos sin el. Il delinquent supponì haja la polizia pudì arrestar anc al lieu. Abe haja tutgà a sasez vi dal pez cura ch'el saja collabà e sia chamischa saja stada plain sang. El è vegnì transportà en l'ospital.
Primminister Kishida rumpa giu cumbat electoral
Il primminister dal Giapun, Fumio Kishida ha rut giu il cumbat electoral suenter l'attentat sin ses antecessur. El saja immediat sa mess sin viadi da la prefectura Yamagata enavos en la chapitala Tokio. Sia regenza è vi dad endrizzar in stab da crisa.
Er da vart da l'opposiziun haja gì num, che violenza encunter activitads politicas na saja absolutamain betg acceptabla, ha ditg in represchentant da la partida communista.
Cassis reagescha en in Tweet
En in tweet ha Ignazio Cassis, il minister da l'exteriur svizzer condolà a la famiglia da Shinzo Abe sco er a la populaziun giapunaisa. El saja enorm trist da sia mort e condemneschia fermamain quest assassinat terribel.
Reacziuns da politichers sin l'entir mund
Reagì sin l’assassinat da l’anteriur primminister giapunais Shinzo Abe han era politicras e politichers d’aut rang sin l'entir mund. Il president american Joe Biden ha ditg ch’el saja indignà e fitg trist. Quai saja ina tragedia per il Giapun e per tut quels ch'enconuschevan Abe. Il president franzos Emmanuel Macron ha ditg ch’il Giapun haja pers in grond primminister.
Il Giapun spetgan grondas midadas
L'assassinat haja consequenzas per la politica giapunaisa. Quai ha ditg il schurnalist Martin Fritz, anteriur correspundent da l'ARD a Tokio. Ils ultims 10 onns haja Shinzo Abe dominà la politica dal Giapun. Er suenter ch'el era sa retratg sco primminister avant dus onns è el restà la persuna cun la pli grond'influenza en la politica interna. Uschia vegni a dar ina gronda midada per la partida liberaldemocratica en il Giapun.
La regenza dad Abe
Shinzo Abe ha regì il Giapun dal december 2012 enfin il settember 2020 ed è cun quai stà il primminister ch'ha regì il pli ditg il pajais. Durant quest temp è il pajais glischnà marcantamain direcziun da la dretga. Abe ha cumbattì ferm per ina revisiun da la constituziun pacifistica suenter ils onns da la guerra.
En l'artitgel 9 da quella constituziun desista il Giapun «per adina sin la guerra sco in dretg suveran da la naziun ed er da smanatschar cun violenza sco med per schliar conflicts internaziunals». Abe è stà da l'avis che questa constituziun na correspundia betg a quella d'ina naziun independenta damai che quella è vegnida sfurzada si al pajais il 1946 dals Stadis Unids.
