Siglir tar il cuntegn

Header

Navigaziun

Via a Lyon cun blera preschientscha da polizia.
Legenda: Tar in'explosiun en ina via a Lyon èn il venderdi saira 13 persunas vegnidas blessadas. Keystone
cuntegn

Suenter explosiun a Lyon La tschertga da l'attentader è en cursa

Tar ina explosiun en il center da Lyon, èn almain 13 persunas vegnidas blessadas. Da quellas persunas sa chattan actualmain anc 3 en l'ospital. Duas da quellas persunas hajan levas blessuras ed ina pli grevas, ha ditg il burgamester da la citad franzosa.

Satg u cofra cun chargia explosiva

L'explosiun è capitada il venderdi saira en ina via dal center da la citad franzosa. Al lieu da l'explosiun saja explodì in satg u ina cofra cun ina chargia explosiva che cuntegneva struvas e guttas. Quai rapporta Franceinfo sa referind sin infurmaziuns dal ministeri da l'intern da la Frantscha. La procura publica franzosa ha confermà che spezialists dad anti-terror hajan surpiglià las investigaziuns.

Entant tschertga la polizia in um suspectà da var 30 onns. La notg sin sonda ha ella publitgà in maletg d'ina camera da surveglianza che mussa in um per part mascrà.

President da la citad è consternà

Suenter l'explosion a Lyon cun 13 blessads è il president da la citad, Gérard Collomb, sa mussà consternà. I fetschia mal, ha ditg l'anteriur minister da l'intern da la Franscha la sonda envers l'emettur da televisiun BFM TV. Ch'insatgi vegnia blessà tar ina tala attatga en ina citad paschaivla sco Lyon na saja betg da chapir.

RR novitads 11:00