Suenter che la Frantscha e la Gronda Britannia han attatgà sut la batgetta dals Stadis Unids miras strategicas en la Siria, vulan els turnar a tractar: Els han preschentà al cussegl da segirezza da las Naziuns Unidas in sboz per ina resoluziun nova per la Siria.
Tgi è uss propi responsabel per las attatgas cun gas toxic?
Ina da las propostas da la resoluziun saja tenor la SDA da stgaffir in mecanissem independent per intercurir las probablas attatgas cun gas en la citad da Duma en Siria. Uschia duaja era la responsabladad per las attatgas vegnir sclerida, scriva la SDA.
Anc ier sonda aveva la regenza franzosa punctuà puspè dad avair documents procurads da ses servetsch secret, che duajan mussar ch'il reschim Assad stettia davos las attatgas da gas toxic sin l'agena populaziun a Duma. Uss pari da vegnir pussaivel da sclerir quai tras la resoluziun.
Frantscha vul surprender il timun, Germania gida
La resoluziun saja in sboz franzos, scriva l'agentura vinavant. La Frantscha ha annunzià suenter las attatgas da vulair surpigliar il timun per cuntanscher soluziuns diplomaticas e la finala la pasch per la Siria. Quai ha ditg il minister da l'exteriur franzos Jean-Yves Le Drian.
In emprim pass stoppia esser ina pausa da cumbat en la Siria che vegnia questa giada propi respectada. Plinavant ha el ditg che la Russia – sco alliada dad Assad – stoppia far squitsch sin quel, perquai che lez haja fin ussa adina bloccà in process politic. Gia damaun glindesdi vegnia la Frantscha a cumenzar cun in'iniziativa e preschentar in urari.
Il minister da l'exteriur tudestg Heiko Maas aveva annunzià avant, che la Germania veglia s'engaschar ensemen cun la Frantscha per ina soluziun diplomatica en Siria.
Israel fa frunt cunter l'Iran
Er l'Israel ha in interess fundamental en la guerra en ed enturn la Siria: Tenor dus ministers israelians veglia l'Israel impedir, che l'Iran etableschia forzas militaras fixas en Siria. Ils ministers beneventan bain las attatgas dals pajais dal vest. Els èn dentant da l'avis, che quellas na vegnian a midar fundamentalmain la situaziun en la Siria.
Per l'Israel saja ina preschientscha stabla da l'Iran en la Siria in privel existenzial: L'Iran emprovia da stabilir en l'entir Proxim Orient ina pre-dominanza. L'armada israeliana saja semtgada per scadina reacziun dal reschim iranais.
Er la Svizra s'annunzia en chaussas Siria
Il di suenter las attatgas èn ils cussegliers federals Guy Parmelin ed Ignazio Cassis sa mussads en intervistas cun las gasettas da la dumengia preoccupads da la situaziun. La Svizra appelleschia a las partidas involvidas da betg laschar escalar la situaziun, ha ditg Cassis.
Parmelin avess giavischà dals Stadis Unids, da la Gronda Britannia e da la Frantscha dapli retegnientscha. Uschia avessan ils stadis dal vest stuì spetgar giu las investigaziuns internaziunalas sur da las armas chemicas en Siria, ha accentuà il minister da defensiun Parmelin.
RR novitads 08:00++