La regenza da la Sri Lanka vesa las attatgas da dumengia da Pasca en connex cun l'attatga sin moscheas a Christchurch en la Nova Zelanda dad avant in mais. Uschia ha il viceminister da defensiun Ruwan Wijewardene declerà avant il parlament dal pajais.
Stadi Islamic sa declera responsabel
La milissa terroristica Stadi Islamic ha declerà d'esser responsabla per las attatgas a Sri Lanka. Quai ha annunzià il portavusch da propaganda dal Stadi Islamic. Quels che hajan attatgà dumengia da Pasca baselgias ed hotels en Sri Lanka, sajan cumbattants dal Stadi Islamic.
Dapli dretgs per las forzas dal stadi
Dus dis suenter las attatgas da suicidi cunter baselgias ed hotels ha il president da la Sri Lanka, Maithripala Sirisena, proclamà il stadi d'urgenza per ses pajais.
Quai saja necessari per la segirezza publica e per pudair furnir la populaziun cun rauba e servetschs, scriva Sirisena en ina declaraziun. Tras il stadi d'urgenza han tant la polizia sco er autras forzas da segirezza dapli dretgs – uschia per exempel per tschertgar tras chasas o arrestar persunas.
Dapi las attatgas sajan vegnidas tschertgadas pli che 20 chasas e 42 persunas sajan vegnidas arrestadas.
Cifra da victimas crescha sin 311
Fertant saja creschida la cifra da victimas tras las attatgas da suicidi da la dumengia da Pasca sin 311, ha infurmà la polizia il mardi. 37 persunas èn esters. Dapli che 500 persunas blessadas sajan anc en ils ospitals.
Dus svizzers tranter las victimas
Il glindesdi da Pasca aveva il Departament federal d'affars exteriurs confermà ch'era dus burgais svizzers sajan morts tar las attatgas en la Sri Lanka.
Ina da las duas unfrendas svizras possedeva ina segunda naziunalitad. In terz commember da famiglia che possedeva duas naziunalitads estras è medemamain mort.
RR novitads 08:00