Siglir tar il cuntegn

Header

Navigaziun

Purtret da persunas durant ina messa per commemorar las unfrendas da l'attatga.
Legenda: La regenza da Sri Lanka suppona che las attatgas da la fin d'emna sajan stadas la vendetga per las attatgas sin moschesas a Christchurch en Nova Zelanda. Keystone
cuntegn

Exteriur Suenter las attatgas: Vendetga per Christchurch

Fertant che la cifra da morts crescha, ha proclamà il president da Sri Lanka il stadi d'urgenza. Il viceminister da defensiun ha plinavant declerà oz che las attatgas sajan stadas la vendetga per las attatgas sin pliras moscheas a Christchurch en Nova Zelanda.

La regenza da la Sri Lanka vesa las attatgas da dumengia da Pasca en connex cun l'attatga sin moscheas a Christchurch en la Nova Zelanda dad avant in mais. Uschia ha il viceminister da defensiun Ruwan Wijewardene declerà avant il parlament dal pajais.

Stadi Islamic sa declera responsabel

La milissa terroristica Stadi Islamic ha declerà d'esser responsabla per las attatgas a Sri Lanka. Quai ha annunzià il portavusch da propaganda dal Stadi Islamic. Quels che hajan attatgà dumengia da Pasca baselgias ed hotels en Sri Lanka, sajan cumbattants dal Stadi Islamic.

Dapli dretgs per las forzas dal stadi

Dus dis suenter las attatgas da suicidi cunter baselgias ed hotels ha il president da la Sri Lanka, Maithripala Sirisena, proclamà il stadi d'urgenza per ses pajais.

Quai saja necessari per la segirezza publica e per pudair furnir la populaziun cun rauba e servetschs, scriva Sirisena en ina declaraziun. Tras il stadi d'urgenza han tant la polizia sco er autras forzas da segirezza dapli dretgs – uschia per exempel per tschertgar tras chasas o arrestar persunas.

Dapi las attatgas sajan vegnidas tschertgadas pli che 20 chasas e 42 persunas sajan vegnidas arrestadas.

Cifra da victimas crescha sin 311

Fertant saja creschida la cifra da victimas tras las attatgas da suicidi da la dumengia da Pasca sin 311, ha infurmà la polizia il mardi. 37 persunas èn esters. Dapli che 500 persunas blessadas sajan anc en ils ospitals.

Dus svizzers tranter las victimas

Il glindesdi da Pasca aveva il Departament federal d'affars exteriurs confermà ch'era dus burgais svizzers sajan morts tar las attatgas en la Sri Lanka.

Ina da las duas unfrendas svizras possedeva ina segunda naziunalitad. In terz commember da famiglia che possedeva duas naziunalitads estras è medemamain mort.

Las attatgas da Pasca en la Sri Lanka

Personen-Box aufklappenPersonen-Box zuklappen

Tar ina seria d'attatgas sin baselgias cristianas e hotels la dumengia da Pasca a Sri Lanka hai dà almain 311 morts. Las emprimas sis explosiuns èn capitadas durant messas da Pasca en trais baselgias en differentas parts dal pajais sco era en trais hotels da luxus en la chapitala da Colombo. Las ultimas duas explosiuns èn capitadas en l'aglomeraziun enturn la chapitala. La setavla er en in hotel. L'otgavla en in quartier d'abitar er en in lieu da l'aglomeraziun da la chapitala Colombo.

A Sri Lanka vivan passa 21 milliuns persunas, radund 7% da quellas èn Cristians. Tar els tutgan ils commembers da la minoritad tamila e da la minoritad singhalesa. La maioritad dal pajais èn budists.

RR novitads 08:00