- La regenza russa ha annunzià sia demissiun e prepara uschia la via al president Wladimir Putin per ina refurma da la constituziun.
- Quai ha il primminister Dimitri Medwedew declerà en la televisiun statala en preschientscha da Putin
- Il president dal stadi Putin vegnia a nominar ina nova regenza ed ha ordinà al cabinet actual da restar fin lura en uffizi, rapporta l'agentura Interfax
- Sco nov primminister e successur da Medwedew propona Putin il manader da l'administraziun da taglia russa, Michail Mischustin.
Tenor la veglia da Putin duai Medwedew daventar vicepresident dal cussegl da segirezza naziunal e là esser responsabel per las spartas defensiun e segirezza. Putin sez resta president da quest gremi.
Refurma da la constituziun planisada
Paucas uras avant ha Putin declerà en ses pled a la naziun, ch'el veglia dar dapli pussanza al parlament cun refurmar la constituziun. Uschia duain en l'avegnir ils deputads eleger il primminister. Fin uss ha il president proponì il primminister e la Duma, il parlament russ, ha elegì. Putin vul dentant salvar il ferm sistem presidial. Critichers renfatschan ad el ch'el lavuria gia vid mantegnair sia pussanza suenter il 2024. Lura va a fin ses temp d'uffizi sco president e tenor constituziun sto el demissiunar.
Dapi il 1999 è Putin a la pussanza u sco president u sco primminister.
RTR novitads 17:00