En ils dus quartiers da Moleno e Preonzo da Bellinzona pon ins actualmain betg baiver l'aua, quai han las autoritads dà enconuschent sin Alertswiss. L'aua saja tschufragnada microbiologicamain. Perquai scumondan las autoritads da baiver l'aua. Ins possia be baiver u cuschinar cun l'aua sche quella haja buglì tschintg minutas.
Ferms vents e plievgia
La zona da pressiun bassa Aline ha purtà blera plievgia e vents burascus. Quai surtut en las regiuns dal sid. Tenor SRF Meteo haja dà sin l'ospizi dal Bernina 200 millimeters plievgia per meter quadrat, a Vicosoprano èn crudads 178 millimeters ed ad Airolo 164 millimeters per meter quadrat.
La Confederaziun avertescha da s'infurmar e sa mover precaut. Surtut en la vischinanza da lais, flums ed auals. Privel aut vala en las regiuns Avras, Valragn, Lumnezia, Val e Medel e Sumvitg. Privel remartgabel en l'ulteriur Grischun senza l'Engiadina Bassa ed il Partenz.
Malauras er en auters pajais
Malauras han chaschunà auas grondas ed inundaziuns a la costa tudestga da la Mar da l’Ost. Pertutgadas sajan stadas ils Bundesländer Schleswig-Holsteni e Mecklenburg-Vorpommern, han communitgà las autoritads localas. Sin l’insla Fehmarn saja ina dunna morta en ses auto, cura ch’ina planta saja derschida sin quel. Entant para la situaziun da sa calmar puspè: Il servetsch meteorologic ha abolì l’avertiment da suffels da stemprà. Suenter las malauras quintan ins sulet en il Bundesland Schleswig-Holstein cun donns da pli che 100 milliuns euros.
En Scozia èn duas persunas mortas en consequenza da vents burascus e flums che creschan. Las autoritads averteschan che las auas creschian vinavant.
En la Frantscha dal sid èn vias e scolas serradas e current electric interrut en la regiun enturn Nizza e Cannes. Là han las autoritads proclamà il pli aut stgalim d'alarm.
