La top-diplomata americana Victoria Nuland è s’inscuntrada cun ils manaders da la junta militara en il Niger. Quai rapportan pliras medias: Ils discurs en la chapitala Niamey hajan cuzzà passa duas uras e sajan stads fitg averts e per part difficils. Nuland haja er supplitgà da discurrer cun il president en arrest, Mohamed Bazoum. Quai haja la junta dentant betg lubì. Era na sajan ils militars betg entrads sin las propostas dals Stadis Unids.
La junta militara ha da sia vart preschentà glindesdi saira l’econom Ali Lamine Zeine sco nov primminister, sco las medias rapportan vinavant. Lamine Zeine è stà fin il 2010 minister d'economia e da finanzas en il pajais vest-african. Ils 26 da fanadur ha l'armada fatg in putsch en il Niger e mess giu il president Bazoum ch'è vegnì elegì a moda democratica.
