Siglir tar il cuntegn

Header

cuntegn

Suenter tensiuns da cunfin La Serbia ed il Cosovo duain s'inscuntrar a Brüssel

Suenter la nova escalaziun da tensiuns tranter la Serbia ed il Cosovo ha l'Uniun Europeica envidà las partidas da conflict ad in inscunter da crisa a Brüssel. La finamira saja da cussegliar davart il proceder e d'impedir che talas tensiuns sa repetian.

Quai ha ditg in pledader da l'incumbensà per l'exteriur da l'UE. Las dispitas sa laschian be schliar cun dialogar e cun contractar.

L'invit da l'UE è succedì tenor indicaziuns dal pledader suenter ch'il Cosovo era sa declerà pront da suspender per il mument las reglas da viadi dispitaivlas per Serbs, quai sin dumonda da Borrell e dals Stadis Unids da l'America. Quellas prevesan ch'i na vegnan pli renconuschids nagins documents serbs als cunfins. Empè da quai duevan Serbs survegnir a partir da glindesdi in document provisoric. Las autoritads cosovaras motiveschan quai cun in proceder identic d'autoritads serbas per passar sur ils cunfins da burgais cosovars.

Sco reacziun sin la nova regla planisada han Serbs militants construì barricadas en il nord dal Cosovo, nua che oravant tut Serbs vivan. Ultra da quai duai era vegnir sajettà en direcziun da policists cosovars.

L'UE emprova dapi onns da gidar a sclerir la relaziun tranter la Serbia ed il Cosovo. Quella è fitg tendida, perquai ch'il Cosovo, ch'è oz quasi exclusivamain abità dad Albanais, era sa separà l'onn 1999 cun agid da la Nato da la Serbia e sa declerà sco independent l'onn 2008. Passa 100 pajais, per exempel la Germania, han renconuschì l'independenza dal Cosovo. Auters, tranter quels la Serbia, la Russia, la China e tschintg pajais da l'UE, na fan fin oz betg quai.

In termin per l'inscunter planisà a Brüssel n'è l'emprim betg vegnì numnà.

RTR novitads 17:00

Artitgels legids il pli savens