La Boeing 737 MAX 8 era sin viadi en l'intern da l'Indonesia: Ella era partida da la chapitala Jakarta per il sgol da radund in'ura sin l’insla Bangka. Curt suenter la partenza haja il pilot dumandà da pudair turnar a Jakarta pervi dad in problem a bord, citescha l'agentura da novitads Reuters il schef da la Lion Air. Il contact sur func saja interrut curt suenter.
Pli tard hajan ils servetschs da salvament vis tocca da l’aviun en la mar. La speranza da chattar anc survivents saja pitschna, scrivan las agenturas.
Naziunalitad dals passagiers anc betg enconuschenta
A bord eran tenor la direcziun generala per il traffic civil en l’aria 178 creschids, in uffant, dus poppins e la crew da set persunas. Sch’i sajan stads er esters a bord na saja anc betg enconuschent, scriva l’agentura da novitads SDA.
L'aviun saja stà pir dus mais vegl e da quels be 800 uras en l'aria, citescha Reuters il schef dal comitè da segirezza en l'aria indonaisa. La Boeing haja gì in problem tecnic, quel saja dentant vegnì evas avant il sgol dal glindesdi.
RR novitads 06:00