Nintendo è ina firma da tradiziun. Ed a questa moda è ella er sa cumportada durant l’èra da smartphones – numnadamain cun ditg far nagut.
Temps passads: Oz è cumparì l’emprim il gieu per telefonins da Nintendo sut la batgetta da lur mascottin – «Super Mario Run». In mument istoric per l'interpresa fundada il 1889.
Currer e siglir be cun in det
Super Mario Run è in gieu che suonda ses gronds frars, in classic ‘jump and run’. Ma auter che fin qua, na sto il giugader betg procurar che la figura da Mario curra; Quai fa ella da sez.
Il giugader po dentant – gea sto schizunt – far siglir Mario cun dar cumonds ad el. E quai be cun in det. Il gieu è numnadamain concepì per in public vast che n'ha forsa betg grond'experientscha cun gieus da computer. Er pon ins uschia giugar, cura ch’ins è sin via.
L’emprim per iPhone, suenter per Android
Nintendo fa pass precauts. Uschia cumpara Super Mario Run l’emprim be per iPhone ed iPad. Proxim onn duai lura suandar ina versiun per sistems cun Android.
Telechargiar il gieu
Super Mario Run po vegnir testà gratuitamain. Tgi che vul dentant giudair l’entir’experientscha sto pajar radund 10 francs (USA 9,99 dollars) – quai dentant be ina giada. I na dat nagins custs supplementars u zuppads.