Tar dumondas centralas da la segirezza naziunala na survegnia sia squadra betg tut las infurmaziuns necessarias dal departament da defensiun – uschia il president futur. Tenor Biden n’è quai betg responsabel. Concret ha Biden accusà il ministeri da defensiun. Quel mettia crappa en via a ses team ed impedeschia ina surdada.
Gia avant aveva il team da Biden reclamà ch'il ministeri da defensiun stritgia sedutas e retegnia infurmaziuns. Il pentagon dentant na lascha betg valair las renfatschas. Il minister da defensiun, Chistopher Miller ha declerà glindesdi, ch'ils collavuraturs dal pentagon hajan lavurà a moda fitg professiunala e vegnian er vinavant a far quai.
Il president vertent, Donald Trump aveva pers l'entschatta november il cumbat electoral per il presidi encunter il democrat Joe Biden. El na vul dentant betg conceder sia terrada. Pir suenter emnas aveva Trump avisà sia glieud da cumenzar cun la surdada da las fatschentas.
La surdada da la regenza a moda ordinada, è fixada en la escha. Finamira è ch'ils Americans possian adina sa laschar sin quai ch'els hajan ina regenza che funcziuna.
