Theresa May ha annunzià las elecziuns surprendentamain en in discurs a la naziun, ch’ella ha tegnì a mezdi davent da la Downing Street 10. Quai malgrà ch’ella haja exclus ils ultims mais da far elecziuns novas, rapportan las agenturas da novitads.
May vul stabilitad tras elecziuns novas
Il parlament na sajan betg unì en la dumonda co contractar davart l’extrada da la Gronda Britannia ord da l’UE. Cun elecziuns novas possian vegnir purtà stabilitad per ils onns proxims, ha ditg May. La proposta vegn May a far damaun el parlament. Per chi vegn tar elecziuns novas dovra quai ina maioritad da duas terzas.
Emprimas reacziuns sin l'annunzia da May
La pli gronda partida d’opposiziun en Gronda Britannia la partida Labour sustegna ils plans da la primministra Theresa May da far elecziuns novas il zercladur, quai ha ditg il schef da Labour Jeremy Corbyn.
Ed il schef da la partida per in independenza dal Reginavel Unì UKIP Paul Nuttall ha annunzià da vulair cumbatter per ch’il Brexit vegnia realisà a moda stricta, uschia saja mintga vusch per UKIP in'admoniziun a Theresa May.
Tenor ils observaturs politics rinforzia la decisiun ad elecziuns novas la primministra sin sia via envers il Brexit, il divorzi da la Gronda Britannia da l’Uniun europeica UE.
RR novitads 14:00++
