L’entschatta matg aveva la polizia englaisa arrestà Julian Assange en l’ambassada da l’Ecuador. Là aveva l’um da 47 onns passentà ils davos set onns, damai che la Svezia aveva dumandà la Gronda Britannia d’extrader el.
Il 2010 avevan duas dunnas en la Svezia denunzià Assange pervi da violaziun e mulesta sexuala. Questas renfatschas ha el adina snegà. Autras renfatschas èn entant surannadas.
Americans vulan era Assange
Dasper la Svezia vulan era ils Stadis Unids survegnir Julian Assange, pervi da conspiraziun ensemen cun la whistleblower Chelsea Manning. Quella aveva surdà il 2010 a Wikileaks tschientmillis da documents militars secrets. Quels pertutgavan acziuns militaras dals Americans en l’Irac ed en l’Afganistan.
RR novitads 12:00