La presidenta da la Confederaziun, Simonetta Sommaruga è schoccada da las attatgas en Frantscha. Ella sentia nunditga tristezza ed il medem mument era nunditga gritta, ha ditg Sommaruga a Berna en in'intervista cun la televisiun SRF.
La situaziun da segirtad en Svizra vegn revalitada regularmain
La polizia federala Fedpol e las polizias chantunalas sajan alarmadas e mussian dapli preschientscha enturn ils bajetgs franzos en Svizra. La situaziun da segirtad vegnia revalitada regularmain. Il mument na dettia quai nagins indizis ch'i dettia era Svizzers tranter las unfrendas da las attatgas terroristicas a Paris. Il departament federal per fatgs da l'exteriur ha instradà ina hotline per persunas che tschertgan confamigliars a Paris.
Auters vischins da la Frantscha èn er alarmads
Suenter la Belgia e la Gronda Britannia, ha era la chanceliera federala tudestga Angela Merkel clamà ad ina sesida da crisa cun ils ministers. Plinavant ha Merkel sincerà a la Frantscha tut l'agid pussaivel en il cumbat cunter ils terrorists. L'Italia ha entant era rinforzà las mesiras preventivas
Er il mund arab reagescha
Il grond imam da la moschea Al-Azhar a Kairo condemnescha las attatgas «plain odi» ed appellescha a solidaritad. «L'entir mund sto s'unir per far frunt a quest monster», ha ditg scheich Ahmed Al-Tayeb. La moschea Al-Azhar vala sco instituziun cun gronda influenza en il mund muslim sunnit.
Il «mund dal vest» empermetta agid e solidaritad
Il cussegl da segirezza da l'ONU ha condemnà las attatgas da terror sco «barbaricas e faigas». Ils culpants stoppian vegnir fatg responsabels per quests acts. Il president american Barack Obama ha empermess agid e taxà ils attentats sco attatgas sin l'entira umanitad e las valurs universalas. Il secretari general da l'allianza militara NATO Jens Stoltenberg ha empermess sustegn ed ha punctuà ch'il terrorissem na vegnia mai a surventscher la democrazia.
Medias socialas
En las medias socialas datti bleras decleraziuns da solidaritad per l'entira Frantscha.
RR novitads 06:00+
