Siglir tar il cuntegn
Inhalt

Exteriur Svizra ha exportà dapli material da guerra

La Svizra ha exportà ils emprims nov mais da quest onn considerablamain dapli material da guerra che durant la medema perioda da l'onn passà. L'augment munta a 17,6%, uschia las cifras dal Secretariat da stadi per l'economia (Seco). Tenor il Seco mussian quellas cifras be la situaziun mumentana.

muniziun.
Legenda: L'augment dals exports da material da guerra pudess esser muniziun per la debatta en il parlament. Keystone

Las cifras dal Seco sa basan sin las indicaziuns da las decleraziuns d'export dals exportaders. Tenor quellas han interpresas svizras exportà material da guerra en valita da 299,2 milliuns francs. Quai èn 44,7 milliuns francs dapli che durant la medema perioda da l'onn passà.

A lunga vista

Il Seco relativescha entant las cifras. Guardà sur la media da plirs onns giajan las cifras enavos. Las cifras da quartal mussian be la situaziun mumentana. A lunga vista giajan ils exports enavos.

Exports en 61 pajais

Ch'i vegn exportà material da guerra en pajais da conflict na plascha betg a la GSoA. Uschia saja vegnì exportà material da guerra en valita da 15 milliuns francs en pajais ch'èn involvids en la guerra dal Jemen. Er en la Tailanda ed en il Pakistan saja vegnì exportà quest onn dapli.

Debatta emoziunala

Las ultimas emnas han divers rapports da medias provocà ina discussiun davart ils exports da material da guerra. Uschia èsi per exempel vegnì enconuschent che granatas da la Ruag èn vegnidas duvradas en la Siria ed en la Libia.

RR novitads 16:00