Siglir tar il cuntegn

Header

cuntegn

Taglia globala sin concerns Ueli Maurer: «Taglia globala da 15% duai esser pussaivla per nus»

I saja pussaivel da realisar la refurma da taglia globala en Svizra, quai di Cusseglier federal e minister da finanzas Ueli Maurer. La refurma prevesa tranter auter che concerns gronds ston pajar ina taglia minimala da 15%.

Las consequenzas che la refurma da taglia globala ha per la Svizra èn concretas: Actualmain ston concerns gronds pajar en dus terzs dals chantuns damain che 15% taglia. Quels chantuns stuessan pia adattar lur sistem da taglia. Per la realisaziun da la taglia globala en Svizra na datti però anc nagins plans concrets, ha Ueli Maurer declerà envers SRF.

audio
Refurma da taglia globala: 15% pussibel per Svizra, di Maurer
02:43 min, Actualitad dals 14.10.2021.
laschar ir. Durada: 02:43 minutas.

Era sch'il Cusseglier federal e minister da finanzas na quenta betg ch'il suveran svizzer sto anc decider a l'urna en chaussa, parta el dal fatg ch'i cuzza intgins onns per realisar la refurma en Svizra. La finamira da la OECD è da realisar la refurma enfin il 2023.

Sustegn dals pajais G20 per ina taglia minimala

Las ministras ed ils ministers da finanzas da las 20 pli grondas pussanzas economicas sustegnan ina refurma globala da la taglia sin concerns. L’element central da la refurma è in’imposta minimala da 15% sin ils gudogns dals concerns. Questa taglia minimala valess er per la Svizra.

La refurma procuria per ina concurrenza fiscala gista, ha ditg il minister da finanzas talian suenter l'inscunter dals pajais G20 a Washington. Cun la taglia minimala duain concerns globals en l'avegnir avair pli paucas pussaivladads da manar lur gudogns en pajais cun taglias pli bassas u paradis fiscals.

Sco proxim sa fatschentan ils schefs da stadi e regenza dals pajais G20 cun la refurma da taglia che duai ir en vigur il 2023.

audio
Per tadlar curt e cumpact
00:56 min, RTR Audio dals 14.10.2021.
laschar ir. Durada: 00:56 minutas.

RTR novitads 06:00

Artitgels legids il pli savens

Scrollar a sanestra Scrollar a dretga