Cun vents da fin a 216 kilometers l'ura ha il taifun numnà «Jebi» furià en il Giapun. «Jebi» ha tutgà l'emprim la provinza Tokushima sin la pli pitschna insla principala dal Giapun. Lura è il taifun sa muventà vers nord.
Almain 11 persunas sajan mortas. Passa 300 ulteriuras persunas sajan vegnidas blessadas. Quai han communitgà las autoritads localas. Ultra da quai ha il taifun impedì u interrut il traffic aviatic e bleras colliaziuns da tren. Pliras chasas sajan vegnidas donnegiadas u stadas senza current electric. Butias sajan stadas serradas.
Ils meteorologs giapunais han avertì la populaziun che la ferma plievgia ed ils suffels da stemprà possian manar ad inundaziuns e bovas. A la costa dal Pacific hai dà undas immensas.
Unfrenda da numerusas malauras
Il pajais insular è l'ultim temp adina puspè daventà in'unfrenda da grevas malauras. Cunzunt il vest da la terz gronda economia dal mund hai tutgà cun tutta vehemenza. Tar inundaziuns e bovas èn là passa 220 persunas mortas.
RR novitads 10:00