Tenor indicaziuns dal Departament federal d'affars exteriurs EDA n'èn naginas persunas svizras vegnidas blessadas. Las unfrendas èn da la Tailanda. Da gievgia saira enfin venderdi haja dà entaifer paucas uras almain diesch detunaziuns en tschintg citads tailandaisas. Quatter bumbas sajan explodidas en il lieu turistic Hua Hin, duas ulteriuras bumbas sin l'insla da vacanzas Phuket.
Las autoritads discurran da «sabotascha locala»
Il militar discurra al mument dad in’attatga coordinada cun quai ch’ils attentats hajan grondas parallelas. Las autoritads tailandaisas minimeschan la seria da bumbas e discurran da «sabotascha locala sin basa da fatgs interns».
La Tailanda festivescha oz venderdi il 84avel anniversari da la regina Sirikit. Sch’i dat in connex tranter festivitads ed attatgas n’è actualmain betg clar.
Resistena encunter Bangkok
Dapi in putsch militar regna in Tailanda il militar. En il sid dal pajais, nua che la populaziun è en emprima lingia muslima u malaica datti dapi onns resistenza cunter la regenza a Bangkok. Uschia avevan quellas regiuns anc refusà la fin d’emna ina constituziun nova.
RR novitads 06:00 ++