La Svizra reagescha sin la situaziun en l'Afganistan e la grond'offensiva dals Taliban. Ord raschuns da segirezza vegnian las 3 persunas svizras che lavuran actualmain là per il Departament federal d'affars exteriurs (DEZA) a bandunar uschè spert sco pussaivel il pajais. Quai ha annunzià questa saira la secretaria da stadi da l'EDA, Livia Leu. La situaziun en il pajais pegiureschia di per di.
Radund 40 emploiads indigens, che lavuran per la Svizra en l'Afganistan survegnan ensemen cun lur famiglias in uschènumnà visum umanitar per vegnir en Svizra.
Organisaziuns umanitaras preoccupadas
Tenor l'Agid svizzer als fugitivs ed Amnesty International duai la Svizra conceder a persunas da l'Afganistan cun ina dumonda d'asil refusada, in'admissiun provisorica. Enstagl che quels sajan durant in pli lung temp dependent da l'agid d'urgenza, duain els survegnir in status da dimora che lubeschia da manar ina vita normala, han ditg l'Agid svizzer als fugitivs ed Amnesty International sin dumonda da l'agentura da novitads Keystone-sda.
La mesemna aveva la Svizra decidì da betg trametter enavos il mument, requirents d'asil refusads en l'Afganistan.
Situaziun pli e pli precara
Depi che las truppas internaziunalas han bandunà l'Afganistan l'avrigl passà vegn la situaziun mendra e mendra. Entant han ils Taliban militants occupà e controlleschan passa la mesadad da tut las capitalas da las provinzas. Suenter Kandahar, la segund gronda citad, èn ils Taliban curt avant la chapitala Kabul.