Ils Talibans militant-islamics che regian en l'Afganistan han prescrit a las dunnas da purtar in vel da corp entir en la publicitad. Il tschadori – ina burca che tanscha da chau fin a pe – saja la meglra furma da vel islamica, hai gì num la sonda en in'ordinaziun dal ministeri per la promoziun da la virtid e l'impediment dal vizi. Cun excepziun da las mattas e dunnas pli veglias stoppian las dunnas cuvrir lur fatscha per evitar «provocaziuns» tar l'inscunter cun umens esters.
Vestgì blau cun in giatter
Il vestgì blau cun in giatter avant la fatscha è gia stada prescritta per dunnas en l'Afganistan sut il domini dals Talibans fin a l'intervenziun da las truppas dal vest 2001. Tar la nova surpigliada da la pussanza dals Talibans, la stad passada, aveva in pledader dals Talibans ditg ch'i na vegnia betg spetgà en l'avegnir da las dunnas en l'Afganistan ch'ellas portian puspè burca.
Emprimas mesiras
Il favrer avevan ils Talibans gia ordinà ch'emploiadas feminins stoppian purtar in hidschab. En l'Afganistan portan las bleras dunnas per ordinari in faziel da chau sco hidschab. Dunnas pli veglias u dunnas en territoris rurals portan ultra da quai ina burca, sch'ellas bandunan la chasa.
Mesiras adina pli severas
Dapi lur return a la pussanza han ils Talibans relaschà prescripziuns adina pli severas per la vita publica. Uschia na duain las dunnas betg viagiar vinavant sco 45 miglias, var 72 kilometers, senza ina persuna accumpagnanta masculina. Mattas na dastgan betg frequentar scolas da cuntinuaziun, las dunnas na pon en blers cas betg pli returnar a lur plazzas da lavur. Durant l'emprim domini dals Talibans dals onns 1996 fin 2001 eran dunnas e mattas praticamain exclusas cumplettamain da la furmaziun e da la lavur ordaifer lur chasa.
